Fjölmargir veðurtepptir í Borgarnesi

Mjög slæmt veður er undir Hafnarfjalli og ekkert ferðaveður, að sögn varðstjóra lögreglunnar í Borgarnesi. Liðsmenn björgunarsveitarinnar Brákar frá bæjarfélaginu hafa aðstoðað ökumenn undir Hafnarfjalli í allan dag en þar hafa fjölmargir lent í erfiðleikum.

Varðstjórinn segir hótel og gistiheimili í Borgarnesi vera að fyllast. Í seinnifréttum Ríkissjónvarpsins kom fram að hátt á annað hundrað manns væru veðurtepptir í bæjarfélaginu. Meðal þeirra sem þurfa hugsanlega að dvelja í Borgarnesi í nótt eru tæplega 100 krakkar úr Víðistaðaskóla í Hafnarfirði sem eru á leið til Dalvíkur á skíði. Varðstjórinn segir að hópurinn muni að öllum líkindum dvelja í félagsmiðstöðinni.