Terry: Ræðum málin á fundi í kvöld

John Terry, leikmaður Englendinga, viðurkennir að frammistaða liðsins á HM hafi ekki verið nægilega góð hingað til en enska landsliðið gerði markalaust jafntefli við Alsír í síðasta leik. Englendingar hittast á fundi í kvöld til að ræða vandamálin. „Við hittumst í kvöld þar sem verður fundað og farið yfir hvar vandamálin liggja. Það verða allir að leysa frá og segja hvernig þeim líður og hvað þurfi að bæta," segir Terry. Hann vill að allir slaki á og fari að einbeita sér að því að spila fótbolta. „Nú þurfum við allir sem hópur að slaka aðeins á og byrja að gera það sem við erum vanir að gera allt árið með félagsliðum okkar. Það er engin ástæða til að breyta leikstílnum okkar því hingað til hef ég ekki séð neitt lið sem að er ástæða til að hræðast," sagði Terry ákveðinn við Sky Sport. „Argentína hefur staðið sig best hingað til en svo tala allir um Þjóðverja en þeir tapa síðan á móti Serbíu," bætti Terry við. „Ég held að allir viti að við getum spilað vel. Við erum allir stoltir að spila fyrir landsliðið okkar og þurfum að fara út á völl og vilja sigur," sagði Terry.