Michael Owen: Hefur verið góður dagur

„Það var gaman að vinna, gaman að skora og gaman að taka þátt í þessum leik," sagði Michael Owen eftir að Manchester United vann Aston Villa 2-1 og tryggði sér sigur í deildabikarnum.

„Það eina sem skyggði á þetta var að ég meiddist aftan í læri og þurfti að fara af velli. Þetta eru fyrstu meiðslin sem ég verð fyrir síðan ég kom til United. Þetta hefur samt verið góður dagur."

Owen skoraði fyrra mark United í dag. Fjölmiðlar velta því strax fyrir sér hvort þetta mark auki möguleika Owen á að vera í leikmannahópi Englands á heimsmeistaramótinu í sumar.

„Ég hugsa ekki út í það hverjir voru að horfa á leikinn. Ég þekki fullt af fólki sem er fljótt að breyta um skoðun hvort ég eigi möguleika eða ekki (að vera í lokahópnum). Ég hugsa bara um að spila sem best fyrir Man United. Það er frábært ef ég er valinn í hópinn, ef ekki þá gefur það einhverjum öðrum tækifæri," sagði Owen.

Umdeildasta atvik leiksins í dag var þegar Nemanja Vidic braut af sér og réttilega var dæmd vítaspyrna. Margir vildu sjá Vidic fá rauða spjaldið sem aftasti varnarmaður en Serbinn fékk ekki einu sinni að líta gula spjaldið.

„Ég hefði getað gert betur en Agbonlahor gerði vel. Ég tel að þetta hafi ekki verið rautt spjald því ég komst fyrir framan hann, ef ég hefði brotið fyrir aftan hefði þetta átt að vera rautt," segir Vidic.