Kræfir lampaþjófar mynda gróðurhúsin

„Ég efast um að ég kaupi fleiri lampa,“ segir Hannes Kristmundsson, garðyrkjumaður í Hveragerði, sem varð fyrir barðinu á þjófum sem stálu frá honum fimmtíu gróðurhúsalömpum.

Hannes segir að hann hafi á dögunum farið norður í land í rúma viku. Fljótlega eftir að hann kom til baka hafi hann uppgötvað að þjófar hefðu komið í heimsókn á meðan. Hann segir þetta langt frá því í fyrsta skipti sem lömpum sé stolið af honum. „Þeir eru búnir að hirða af mér á annað hundruð lampa. Eitt skipti hurfu lamparnir úr einu húsinu fyrstu nóttina eftir að ég setti þá upp,“ lýsir Hannes sem kveður lampaþjófana vera ótrúlega kræfa og útsjónarsama.

„Ég hef séð þá keyra hér um götur með vídeóvélar að taka myndir af gróðurhúsum og húsasundum. Þeir taka aðstæðurnar upp á myndband og stúdera þetta svo bara heima hjá sér eins og hvern annan handboltaleik,“ segir Hannes.

Tjónið er mikið fyrir Hannes því hver lampi kostar að hans sögn um þrjátíu þúsund krónur. Verðmæti lampanna sem var stolið sé því ein og hálf milljón. Hannes kveðst ekki vera tryggður fyrir slíku tjóni því tryggingarfélögin setji mjög stíf skilyrði. „Þetta er hlutur sem ég þarf bara að kyngja,“ segir hann.

Jólastjörnur og sumarblóm hafa verið kjarninn í ræktunarstarfi Hannesar. Hann segir engin blóm hafa verið í þeim tveimur húsum sem lamparnir voru en að ræktun sumarblóma sé að fara í gang.

„Við vorum búin að safna í tvö hús því sem ekki var ónýtt eftir stóra jarðskjálftann síðast og ekki var þegar búið að stela. Þeir hafa gefið sér góðan tíma og tæmdu hreinlega þessi tvö hús. Þeir hafa bara gengið eftir borðunum til að klippa niður lampana og brutu þá nokkur borð,“ segir Hannes sem telur engar líkur á að þjófarnir stefni á ræktun sumarblóma. „Þetta er ekkert tengt venjulegri garðyrkju, það get ég fullyrt.“

Eins og fyrr segir er Hannes að velta því fyrir sér að endurnýja ekki lampana í þetta skipti. „Þetta þýðir ekkert. Ég held það séu ekki nema tveir eldgamlir lampar sem logar á núna. Þeir höfðu vit á að skilja þá eftir. Ætli maður hætti ekki bara að lýsa nema þá fyrir uppeldis­plönturnar.“ gar@frettabladid.is