Gat ekki hafnað Arsenal

Franski varnarmaðurinn Sebastien Squillaci segir að það hafi einfaldlega ekki verið hægt að hafna Arsenal þegar kallið kom frá Arsene Wenger.

Arsenal og Sevilla hafa komist að samkomulagi um kaupverð á leikmanninum. Hann mun gangast undir læknisskoðun í dag og síðan skrifa undir samning við Lundúnaliðið.

Þessi 30 ára gamli bakvörður gerði allt vitlaust er hann neitaði að spila með Sevilla gegn Braga í Evrópudeildinni á dögunum.

"Ef Frakki fær tilboð frá Arsene Wenger þá er nánast ómögulegt að segja nei," sagði Squillaci.

"Þetta er frábært tækifæri fyrir mig og ég er afar kátur með að Sevilla hafi sleppt mér. Ég vissi að ef ég myndi spila gegn Braga gæti ég ekki leikið með Arsenal í Meistaradeildinni.

"Ég hef alltaf fylgst vel með Arsenal. Það var ekki annað hægt þegar leikmenn eins og Henry, Pires og Gallas voru að leika með liðinu."