Geir: Ólafur hefur ekki hótað að hætta

Geir Þorsteinsson, formaður KSÍ, segir að Ólafur Jóhannesson, A-landsliðsþjálfari, hafi eðlilega verið ósáttur við að missa marga af sínum bestu mönnum í U-21 árs liðið en þó ekki það ósáttur að hann ætli sér að hætta með liðið.

"Við ræddum þetta mál okkar á milli og skiljanlega er Ólafur ekki kátur með að missa þessa menn. Það var samt allt rætt í góðu og hann hefur ekki hótað því að hætta með liðið," sagði Geir við Vísi.

Geir segir að það hafi verið einhugur innan stjórnar KSÍ að veita U-21 árs liðinu forgang á A-landsliðið í þetta skipti.

Nánar er rætt við Geir í Fréttablaðinu á morgun.