Gleymdist að geta til um þátttöku í Árborg

„Í fyrri frétt um úrslit í forvali Samfylkingarinnar í Árborg, láðist að geta um kosningaþátttöku," segir í tilkynningu frá Samfylkingunni í Árborg vegna prófkjörs sem fór fram í bæjarfélaginu um helgina. Alls kusu 247 í forvalinu sem er rétt tæplega helmingur skráðra félaga í Samfylkingunni í Árborg.

Ragnheiður Hergeirsdóttir, bæjarstjóri, sigraði í forvalinu en hinn bæjarfulltrúi flokksins, Gylfi Þorkelsson, hafnaði í fimmta sæti. Hann sóttist eftir fyrsta sætinu.

„Þátttakan í þessu forvali er hlutfallslega með því besta sem gerst hefur í öðrum sveitarfélögum og öðrum flokkum þar sem lokuð prófkjör hafa farið fram," segir í tilkynningunni.

Í fyrsta sæti varð Ragnheiður Hergeirsdóttir með 69,6 % atkvæða í það sæti.

Í öðru sæti varð Arna Ír Gunnarsdóttir með 41,3 % atkvæða í 1.-2. sæti.

Í þriðja sæti varð Kjartan Ólason með 47 % atkvæða í 1.-3. sæti.

Í fjórða sæti varð Eggert Valur Guðmundsson með 77,3 % atkvæða í 1.-4. sæti.

Í fimmta sæti varð Gylfi Þorkelsson, en kjör hans er ekki bindandi.

Samkvæmt reglum um jafnræði kynjanna, sem samþykktar voru fyrir forvalið, skulu fulltrúar af báðum kynjum vera í fyrsta og öðru sæti og eins í þriðja og fjórða sæti. Þar sem kona varð í 1. sæti, verður sá karl sem hlaut flest atkvæði í 1.-2. sæti í öðru sæti og þar var Eggert Valur atkvæðahæstur karlanna.

Vegna þeirrar reglu verður bindandi röð frambjóðenda þessi:

1. sæti Ragnheiður Hergeirsdóttir

2. sæti Eggert Valur Guðmundsson

3. sæti Arna Ír Gunnarsdóttir

4. sæti Kjartan Ólason