Charlton-Leeds í beinni um helgina

Leikur Charlton og Leeds í ensku C-deildinni verður í beinni útsendingu á Stöð 2 Sport 6 nú um helgina.

Um gríðarlega mikilvægan leik í toppbaráttu deildarinnar er að ræða. Með sigri gæti Leeds tryggt sér sæti í ensku B-deildinni en þarf þá að treysta á að Millwall tapi fyrir Carlisle á útivelli á sama tíma.

Næstsíðasta umferð deildarinnar fer fram á morgun og hefjast allir leikirnir klukkan 14.00.

Verkefni Leeds um helgina verður þó erfitt enda Charlton í fimmta sæti deildarinnar. Leeds mætir svo Bristol Rovers á heimavelli í lokaumferðinni um þarnæstu helgi.

Norwich er þegar búið að tryggja sér sigur í ensku C-deildinni og Leeds, Millwall, Swindon, Charlton og Huddersfield öll örugg með sæti í umspilinu. Það er aðeins spurning um hvert þessara fimm liða fer beint upp með Norwich en þar stendur Leeds best að vígi, eins og taflan lítur út nú.

Staða efstu liða:

1. Norwich 92 stig (+41 í markatölu)

2. Leeds 83 (+33)

3. Millwall 82 (+33)

4. Swindon 79 (+16)

5. Charlton 78 (+20)

6. Huddersfield 77 (+26)