Ráðning Hughes staðfest

Fulham hefur staðfest ráðningu Mark Hughes sem knattspyrnustjóra liðsins en hann skrifaði í dag undir tveggja ára samning við félagið.

Hughes var rekinn frá Manchester City í desember í fyrra og tekur við af Roy Hodgson sem tók við Liverpool í sumar.

„Fulham hefur náð besta árangri í sögu félagsins á síðustu tveimur árum og ég er sannfærður um að við getum haldið áfram á þessari braut," sagði Hughes á heimasíðu félagsins.

Enskir fjölmiðlar telja líklegt að Hughes muni reyna að lokka til sín nokkra leikmenn frá City, til að mynda þá Craig Bellamy, Roque Santa Cruz og Stephen Ireland.