Hægist á fjölgun örorkulífeyrisþega

Verulega hefur hægt á fjölgun örorkulífeyrisþega á þessu ári miðað við það undanfarin ári. Með örorkulífeyrisþegum er átt við þá sem skráðir eru með 75% örorku eða meira. Þetta kemur fram á vef Samtaka atvinnulífsins.

1. júlí var fjöldi fjöldi örorkulífeyrisþega 15.842 en hann var 15.677 í ársbyrjun þannig að fjölgunin á árinu nemur 165 einstaklingum á fyrri hluta ársins. Þetta er mikil breyting frá fyrri árum þar sem örorkulífeyrisþegum fjölgaði um 500-1300 árlega á árunum 2004-2009.

„Í ljósi mikils langtímaatvinnuleysis mætti búast við aukningu í nýgengi örorku en þess sér ekki stað, a.m.k. enn sem komið er. Ef til vill má rekja þessa þróun til forvarnarstarfs Starfsendurhæfingasjóðs sem hefur það að meginmarkmiði að koma í veg fyrir að starfandi fólk missi starfsgetuna vegna langtímaveikinda eða slysa og detti út af vinnumarkaði," segir á vef SA.

Þar segir ennfremur að þótt sjóðurinn hafi starfað í skamman tíma hafi ráðgjafar hans átt regluleg viðtöl við á annað þúsund einstaklinga „og þar af leiðandi hlýtur starfsemi hans þegar að hafa haft merkjanleg áhrif."