Missti hendur og fætur en hleypur hálft maraþon á morgun

Jamie Andrew missti bæði hendur og fætur eftir hræðilegt slys fyrir ellefu árum en ætlar að hlaupa hálft maraþon á morgun. Hann hleypur á fótum frá Össuri en reiknar ekki með að vera meðal fyrstu manna.

Sex afreksmenn frá Bretlandi eru komnir hingað til lands í boði Össurar, en þeir nota allir stoðtæki frá fyrirtækinu. Einn þeirra er Skotinn Jamie Andrew sem missti bæði hendur og fætur eftir að hafa verið fastur í frönsku Ölpunum í fimm daga.

Dó úr ofkælingu

„Það brast á óveður svo við félagi minn vorum fastir á fjallstindi í fimm sólarhringa. Frostið fór niður í 30 stig og vindhraðinn var allt að 36 metrar á sekúndu. Þegar okkur var loks bjargað eftir fimm daga var það um seinan fyrir félaga minn. Hann dó úr ofkælingu og viku síðar þurfti að fjarlægja hendur mínar og fætur," segir Jamie.

Eftir þessa miklu þrekraun ákvað Jamie hinsvegar að halda áfram því sem hann hefur unun af, og hann kvartar ekki í dag.

„Ég vissi strax að ég væri heppinn að sleppa lifandi úr þessum háska og að ég yrði að nýta það sem ég hef. Ég ákvað því að reyna að lifa lífinu til fulls og ég var hissa á því hvað ég gat gert mikið. Ég hef ekki undan neinu að kvarta og er ánægður með tilveruna," segir Jamie.



Alls enginn keppnismaður

Jamie gerir lítið úr hlaupaafrekum sínum en hann er mikill íþróttamaður og eru fjallaferðir hans aðal áhugamál. Hann hefur hlaupið heilt maraþon en ætlar að láta sér nægja hálft á morgun. En á hvaða sæti stefnir hann?

„Ég er alls enginn keppnismaður. Ég er ekki í mjög góðu formi eins og er svo ég hleyp bara til skemmtunar. Ég verð einhvers staðar aftarlega," segir Jamie.