Arnar útilokar ekki að halda áfram

„Við klúðruðum veru okkar í deildinni í fyrri umferðinni og misstum of marga leiki niður í jafntefli sem við áttum að vinna. Þetta var samt fínt sumar að mörgu leyti og sýndum að við eigum alveg heima í þessari deild,“ sagði Arnar Gunnlaugsson, sóknarmaður Hauka, eftir sigur liðsins gegn Val, 2-1 á Vodafone-vellinum í dag.

„Það var eins og að um leið og pressan fór af liðinu þá fórum við að sýna okkar rétta andlit. Við eigum örugglega eftir að hugsa mikið tilbaka um hvar við hefðum getað fengið fleiri stig. Á endanum eru það tvö lélegustu liðin sem falla en miðað við lið sem var að falla þá spiluðum við frábæran fótbolta í lokaumferðunum,“ segir Arnar sem ætlar ekkert að taka ákvörðun um framtíð sína á næstunni.

„Ég ætla að slaka á og er ekkert að spá í þessu. Ég spilaði ótrúlega mikið í sumar og náði átján leikjum sem er mjög gott ef miðað er við undanfarin ár. Ég æfði allt öðruvísi í vetur og hafði ótrúlega gaman af þessu í sumar. Ég veit ekki hversu mörg ár ég á eftir í boltanum og við sjáum til eftir áramót.“