Ísland annað mesta lýðræðisríki heims

Ísland er í öðru sæti á lista The Economist Intelligence Unit, rannsóknarfyrirtækis tímaritsins The Economist, sem hefur raðað ríkjum jarðar eftir því hvar mest lýðræði ríkir. Norðmenn tróna á toppnum með heildareinkunina 9.80 en Ísland fær 9.65 í einkunn. Danmörk og Svíþjóð fylgja í kjölfarið og Nýja Sjáland er í fimmta sæti.

Ísland fær 10 í einkunn þegar kemur að kosningakerfinu, fjölræði og pólitískri menningu, 9.64 þegar litið er á virkni stjórnkerfisins og 8.89 þegar stjórnmálaþáttaka er mæld. Þá fær Ísland 9.71 í flokknum borgaralegt frelsi.

Listinn var fyrst tekinn saman árið 2006 og þá lenti Ísland í öðru sæti og Svíþjóð var á toppnum. Árið 2008 hafði Ísland færst í þriðja sætið á eftir Noregi og Svíþjóð en nú hafa Svíar færst niður í fjórða sætið.

Lýðræði á undanhaldi

Þegar á heildina er litið segja skýrsluhöfundar að dregið hafi úr lýðræði á árinu, en þetta er í þriðja sinn sem listinn er tekinn saman. Ríkin eru flokkuð og er kallast löndin í fyrsta flokki „full lýðræðisríki", næsti flokkur er „gölluð lýðræðisríki" og í þann hóp hafa Frakkar, Ítalir, Grikkir og Slóvenar fallið á árinu. Bretland og Bandaríkin teljast til „fullra lýðræðisríkja" en þau lenda bæði nærri botni þess hóps, og skýrist það af því að mannréttindi þegna landanna hafa verið skert í baráttunni við hryðjuverk.

Síðasta hópinn skipa einræðisríki og fellur stórveldið Kína í þann hóp, en alls teljat 55 lönd í heiminum til einræðisríkja. Norður Kórea er neðs á listanum og telst því mesta einræðisríki jarðar. Helmingur jarðarbúa býr í löndum sem teljast til einhverskonar lýðræðisríkja ern aðeins tíu prósent búa í löndum sem kalla má fullgild lýðræðisríki.

Einn þriðji hluti jarðarbúa býr hinsvegar í einræðisríkjum.



Fullgild lýðræðisríki:

1. Noregur

2. Ísland

3. Danmörk

4. Svíþjóð

5. Nýja Sjáland

6. Ástralía

7. Finnland

8. Sviss

9. Kanada

10.Holland

Einræðisríki:



1. Norður Kórea

2. Tsjad

3. Túrkmenistan

4. Úsbekistan

5. Búrma

6. Mið Afríkulýðveldið

7. Sádí Arabía

8. Miðbaugs Gínea

9. Íran

10. Líbía

Nánar má kynna sér skýrsluna hér.