Sendinefndin gekk af fundinum í London

Íslenska sendinefndin gekk af fundi með Bretum og Hollendingum í London í dag. Þetta er haft eftir ónafngreindum starfsmanni breska fjármálaráðuneytisins á fréttavef Bloomberg í kvöld. Jafnframt er haft eftir honum að bresk og hollensk stjórnvöld séu vonsvikin með þá ákvörðun Íslendinga að hafna tilboði þeirra frá því í síðustu viku.

Hollendingar og Bretar lögðu fram tilboð fyrir tæpri viku sem fól í sér breytt vaxtakjör á Icesave láninu. Um var að ræða breytilega vexti með 2,75 prósenta álagi auk þess sem boðið var upp tvö ár án vaxta.

„Við höfðum vonast til þess að sameiginleg niðurstaða um bætt kjör í Icesave-málinu næðist. Það hefur enn ekki tekist," var haft eftir Steingrími J. Sigfússyni, fjármálaráðherra, í tilkynningu frá fjármálaráðuneytinu fyrr í kvöld.