Tottenham og Liverpool á eftir sjóðheitum sænskum sóknarmanni

Ensku liðin Tottenham og Liverpool hafa áhuga á að fá til sín sænska sóknarmanninn Ola Toivonen sem hefur farið á kostum í fyrstu tveimur leikjum sínum með PSV Eindhoven í hollensku úrvalsdeildinni.

Toivonen hefur skorað fimm mörk í fyrstu tveimur umferðunum með PSV Eindhoven og þá skoraði hann líka eitt marka Svía í 3-0 sigri á Skotum í vináttulandsleik í síðustu viku.

Liverpool var fyrst orðað við leikmanninn en nú hefur Harry Redknapp, stjóri Tottenham, sýnt því áhuga á að fá leikmanninn til sín.

Ola Toivonen er 24 ára og 193 sentímetra framherji sem er á sínu öðru tímabili með PSV en hann spilaði áður með Malmö.