Neyðarblys sáust á lofti í Eyjum

Björgunarfélag Vestmannaeyja var kallað út seint í gærkvöldi eftir að neyðarblys sáust á lofti og óttast var að skip eða bátur væri í vandræðum. Björgunarskipið þór var einnig sent út og varðskip, sem var í grennd við Eyjar, hóf einnig leit.

Skotið var upp hvítum blysum til að lýsa upp hafsvæðið austur af eyjum, en þrátt fyrir góð skilyrði sást ekkert á haffletinum og einskis báts var saknað. Leit var hætt eftir röska klukkustund, enda leikur grunur á að óvandaðir náungar hafi skotið blysunum upp frá Skansinum, eða af nýja hrauninu svonefnda.

Ströng viðurlög eru við því að skjóta upp neyðarblysum að óþörfu. Lögreglan lítur málið alvarlegum augum og ætlar að rannsaka það frekar.