Wenger: Hungrið og hæfileikarnir til staðar

Lundúnaliðin Arsenal og West Ham eiga ólíku gengi að fagna. Arsenal skaust á topp deildarinnar með 2-0 sigri á Hömrunum í gær þrátt fyrir að vera einum færri allan seinni hálfleikinn.

West Ham er í harðri fallbaráttu á meðan lærisveinar Arsene Wenger eru á miklu skriði.

„Við sýndum frábæra frammistöðu. Við spiluðum vel og sýndum mikinn þroska með því að brotna ekki við mikla mótstöðu," sagði Wenger sem var allt annað en sáttur þegar dómari leiksins rak Thomas Vermaelen af velli.

„Þetta var mjög strangur dómur. Við sáum mörg svipuð brot í leiknum sem ekkert var refsað fyrir."

Wenger segir að Arsenal sé ekki undir neitt sérstaklega mikilli pressu. „Við erum að spila yfir væntingum svo ekki er hægt að tala um eitthvað sérstaka pressu. Við viljum vinna titilinn, þó árangurinn hafi verið góður höfum við ekkert unnið enn. Hungrið og hæfileikarnir eru til staðar og ég held að taugarnar séu það einnig," sagði Wenger.

„Þetta verður jöfn og spennandi barátta allt til enda."

Smelltu hér til að sjá svipmyndir úr leikjum helgarinnar í enska boltanum.