Leifur Garðarsson búinn að gera tveggja ára samning við Víking

Leifur Garðarsson verður áfram þjálfari Víkinga sem unnu sér sæti í Pepsi-deild karla með því að vinna 1. deildina í sumar. Leifur tók við Víkingsliðinu fyrir sumarið 2009 og skrifaði í dag undir nýjan tveggja ára saming við Fossvogsliðið.

Leifur reif Víkingsliðið upp eftir slakt fyrsta ár þar sem liðið endaði í 10. sæti B-deildarinnar (af 12) og undir hans stjórn vann liðið 15 af 22 leikjum sínum í sumar og vann deildina með fimm stiga mun.

Víkingur lék síðast í úrvalsdeild karla sumarið 2007 en Leifur á að baki þrjú ár sem þjálfari í úrvalsdeild en hann stýrði Fylkismönnum á árunum 2006 til 2008.