Tosic vill fá fleiri tækifæri hjá United

Zoran Tosic segir að hann vilji fá tækifæri til að spila meira hjá Manchester United á næstu leiktíð. Annars komi til greina að finna sér nýtt félag.

Tosic var lánaður til Köln í Þýskalandi þar sem hann skoraði fimm mörk í tólf leikjum á síðari hluta tímabilsins.

Hann var keyptur frá Partizan Belgrad fyrir átta milljónir punda í janúar á síðasta ári en kom aðeins við sögu í tveimur leikjum United áður en hann var lánaður til Þýskalands.

„Ég vil gjarnan koma aftur til United ef félagið vill fá mig til baka," sagði Tosic í samtali við serbneska fjölmiðla. „En ég vil þó ekki lenda í sömu aðstöðu og ég var síðast þegar ég var þar. Ég vil fá að gegna stærra hlutverki."

„Þetta er allt undir Manchester United komið enda er ég samningsbundinn félaginu."