Hodgson: Valdi ekki Mascherano því hann vill fara

Javier Mascherano var ekki í leikmannahópi Liverpool í 3-0 tapleiknum gegn Manchester City í kvöld vegna þess að hann er óánægður hjá félaginu og vill fara.

Þetta sagði Roy Hodgson, stjóri Liverpool, eftir leikinn í kvöld.

Hann sagði enn fremur að til greina komi að velja ekki Mascherano í liðið þar til að félagaskiptaglugginn lokar um næstu mánaðamót.

Barcelona vill fá kappann í sínar raðir en er ekki sagt reiðubúið að borga þær 25 milljónir punda sem Liverpool vill fá fyrir Mascherano.

„Hann verður hjá okkur þar til að tilboð berst í hann sem er í samræmi við okkar væntingar," sagði Hodgson.

„Leikmaðurinn er óánægður. Honum er alveg sama um kaupverðið og hvort það sé sanngjarnt eða ekki. Hann vill bara fá að fara."

„Þetta er vissulega óþægileg staða fyrir okkur. Þetta verður að leysa en það er alveg ljóst að Javier var ekki tilbúinn að spila þennan leik."