Samningi Shittu hjá Bolton rift

Enska úrvalsdeildarfélagið Bolton hefur rift samningi Nígeríumannsins Danny Shittu.

Bolton keypti Shittu frá Watford fyrir um tvær milljónir punda árið 2008 og þá skrifaði hann undir þriggja ára samning við félagið.

Hann kom við sögu í tólf leikjum á fyrsta tímabili sínu hjá Bolton en spilaði ekkert á síðasta tímabili. Engu að síður var hann byrjunarliðsmaður í landslðiði Nígeríu á HM í Suður-Afríku í sumar.

Óvíst er hvað tekur við hjá Shittu sem hefur spilað í ellefu ár í Englandi, með Charlton, Blackpool, Queens Park Rangers, Watford og nú síðast Bolton.