Capello fær engan frið - Öryggisgæsla hert

Enska knattspyrnusambandið hefur ákveðið að auka gæslu í kringum enska landsliðið. Þetta kemur í kjölfar þess að fjölmiðlum var boðið að kaupa leynilegar upptökur af samtölum milli leikmanna og þjálfara.

Þessar leynilegu upptökur voru teknar á hóteli enska hópsins fyrir vináttulandsleikinn gegn Egyptalandi í síðustu viku.

Enska knattspyrnusambandið hefur hafið rannsókn á því hvernig upptökurnar voru hleraðar og varað fjölmiðla við því að gera þær ekki opinberar.

Fabio Capello virðist fá lítinn frið í undirbúningi sínum fyrir heimsmeistaramótið í sumar. Þetta er enn einn hausverkurinn fyrir hann og kemur rétt eftir að allt umtalið kringum John Terry og Wayne Bridge var að lægja.

Talið er að umræddar upptökur spanni nokkra klukkutíma.