Tommy vill halda áfram í FH - hinir útlendingarnir fara

Tommy Nielsen hefur hug á því að halda áfram að spila með FH á næstu leiktíð. Þá verður hann á 39. aldursári.

Lúðvík Arnarson, varaformaður knattspyrnudeildar FH, segir að það sé vilji til að semja aftur við Nielsen.

„Við erum í samningaviðræðum eins og er og munum fljótlega setjast aftur niður og fara betur yfir stöðuna,“ sagði Lúðvík.

Þá munu þeir Jacob Neestrup og Torger Motland ekki spila áfram með félaginu á næstu leiktíð. Þeir gengu í raðir FH nú í vor og var samið við þá til loka næsta árs.

„Samningar þeirra voru með endurskoðunarákvæði og það voru allir aðilar sammála um að þetta væri besta niðurstaðan,“ sagði Lúðvík.

Þá mun Hjörtur Logi Valgarðsson halda til Noregs á morgun þar sem hann verður til reynslu hjá úrvalsdeildarliðinu Viking í Stafangri.