Loðnan er fundin

Loðnuvertíðin er hafin og eru skip úr íslenska flotanum þegar farin að fiska. Tvö skipa HB Granda, Ingunn AK og Faxi RE, fóru til veiða í síðustu viku en auk þeirra hefur Börkur NK verið að veiðum. Ingunn var komin með um 600 tonna afla í morgun en áhöfnin á Faxa varð fyrir því óláni að nótin rifnaði illa í gær og var unnið að viðgerð á henni um borð í alla nótt.

Guðlaugur Jónsson, skipstjóri á Ingunni, segir á vef HB Granda að skipin séu nú stödd á austanverðum Kolbeinseyjarhryggnum, um 70 sjómílur norðvestur af Melrakkasléttu. Áður en þangað var haldið voru skipin í loðnuleit norður af Vestfjörðum. Vart varð við þokkalegar torfur norður af Kögri en áður en hægt var að kasta á þær lagðist rekís yfir svæðið.