23 ára karlmaður var í gær dæmdur fyrir kynferðisbrot gegn 13 ára stúlku. Maðurinn játaði brotið sem átti sér stað í mars á þessu ári. Í Héraðsdómi Reykjavíkur var maðurinn dæmdur í eins árs skilorðsbundið fangelsi.

Brotið sem maðurinn játaði, samkvæmt ákæru er að hafa „látið A, þá 13 ára, hafa við sig samræði "

Rannsókn málsins hófst að frumkvæði foreldra stúlkunnar daginn eftir atvikið. Þann sama dag var tekin skýrsla af manninum sem játaði brotið. Skýrsla var tekin af brotaþola í Barnahúsi hálfri annarri viku síðar.

Fyrir dómi var lagt fram bréf barnalæknis sem hitti stúlkuna bæði fyrir og eftir atvikið.

Í niðurlagi bréfsins segir:

„Í stuttu máli sagt: Kvíða- og þunglyndiseinkenni sem höfðu verið til staðar í langan tíma hjöðnuðu algjörlega með lyfja- og huglægri atferlismeðferð. Ný einkenni og annarrar tegundar sem falla undir áfallastreituröskun komu fram eftir meint kynferðislegt ofbeldi um mánaðamótin febrúar/mars 2010 og við síðasta eftirlit var greiningarskilyrðum enn fullnægt þó að ástandið væri skárra."

Fyrir hönd stúlkunnar var krafist 800 þúsund króna í miskabætur en í dómi kemur fram að sátt hafi náðst um að maðurinn greiði 600 þúsund krónur í bætur. Því kom sú krafa ekki til kasta dómara.

Í dómi er tekið fram að maðurinn hefur ekki áður sætt refsingu.

„Hann hefur játað brot sitt greiðlega og var samvinnufús við rannsókn málsins. Brot hans er réttilega heimfært til refsiákvæðis í ákæru. Refsing er í samræmi við dómvenju og fyrirmæli 202. gr. hegningarlaga ákveðin fangelsi í tólf mánuði. Þar sem ákærði hefur játað brot sitt greiðlega, samþykkt að greiða bætur og ekki áður sætt refsingu þykir mega skilorðsbinda refsingu hans. Skilorðstími ákveðst þrjú ár," segir þar.