Byko blekkti neytendur - sektað um 10 milljónir

Neytendastofa hefur sektað Byko um 10 milljónir króna fyrir að brjóta gegn þeim lagaákvæðum og reglum sem gilda um útsölur. Það er hæsta stjórnvaldssekt sem Neytendastofa getur beitt.

Fyrirtækið auglýsti sumarið 2009 20% afslátt af allri útimálningu og viðarvörn samhliða því sem kynntar voru nokkrar tegundir af slíkri málningu. Neytendastofa taldi tilboðsauglýsinguna villandi og til þess fallna að blekkja neytendur og hafa áhrif á fjárhagslega hegðun þeirra þar sem tilboðið átti ekki við um þær vörur sem auglýstar voru samhliða tilboðinu. Þá kom fram í skýringum Byko að verð á útimálningu og viðarvörn hafi þegar verið lækkað og því lækkaði það verð sem vörurnar voru verðmerktar á í verslunum Byko ekki um 20% eins og auglýsingin gaf til kynna.

Neytendastofa telur brotið mjög alvarlegt. Að teknu tilliti til þess og sölu á vörunum á auglýsingatímabilinu lagði Neytendastofa 10 milljón króna stjórnvaldssekt á fyrirtækið sem er hæsta lögleyfða stjórnvaldssekt sem Neytendastofa getur beitt.