Ashley Cole snýr aftur síðar í apríl

Chelsea hefur fengið þau skilaboð frá sérfræðingum að bakvörðurinn Ashley Cole ætti að geta spilað að nýju gegn Stoke þann 25. apríl.

Þetta eru einnig góð tíðindi fyrir Fabio Capello, þjálfara enska landsliðsins. Cole ökklabrotnaði í febrúar.

„Þetta lítur vel út með Cole og Michael Essien ætti að snúa til baka af meiðslalistanum viku eftir honum," segir Carlo Ancelotti, knattspyrnustjóri Chelsea.

Vörn Chelsea hefur verið vængbrotin síðustu vikur en auk Cole hafa Branislav Ivanovic og Jose Bosingwa átt við meiðsli að stríða. Ivanovic hefur ekki spilað síðan 21. mars en hann æfði í dag og gæti verið í leikmannahópi Chelsea fyrir bikarslag gegn Aston Villa á laugardag.