Vill að leiðtogar Bandaríkjanna verði jarðaðir

Forseti Írans vill að æðstu yfirmenn Bandaríkjanna verði jarðaðir vegna viðbragða þeirra við kjarnorkuáætlunum Írana, samkvæmt frásögn AP fréttastofunnar. Þetta kom i ávarpi Mahmoud Ahmadinejad, forseta Írans, í dag.

AP segir að forsetinn hafi alltaf haft horn í síðu bandarískra stjórnvalda. Óbeit hans á þeim hafi hins vegar aukist eftir að bandarísk stjórnvöld fóru að upplýsa um hugmyndir sínar þess efnis að ráðast á Íran vegna kjarnorkuáætlana þeirra. Ræða Ahmadinejad var sýnd beint bæði í ríkissjónvarpi en líka á enskumælandi sjónvarpsstöðinni Press TV.

Skammt er síðan að fulltrúar Bandaríkjanna og fleiri vestrænna ríkja stóðu upp og gengu út úr salnum á Allsherjarþingi Sameinuðu Þjóðanna þegar Ahmadinejad flutti ræðu. Í ræðu sinni sagði hann að Bandaríkjamenn hefðu staðið á bak við árásirnar þann 11. september 2001.