Sjö mörk skoruð þegar Aston Villa slátraði Burnley

Aston Villa vann mikilvægan sigur á Burnley í ensku úrvalsdeildinni í dag. Villa vann 5-2 sigur þar sem Steward Downing skoraði tvívegis.

Jóhannes Karl Guðjónsson heldur áfram að vera úti í kuldanum og var ekki í leikmannahópi Burnley í dag.

Burnley er með lakasta árangur á útivöllum af öllum liðum deildarinnar en náði forystunni óvænt þegar Skotinn Steven Fletcher skoraði. Ashley Young jafnaði metin í 1-1 og þannig stóð í hálfleik.

Downing skoraði síðan tvö mörk með skömmu millibili áður en Emile Heskey og Gabriel Agbonlahor bættu við mörkum. Það var svo Martin Paterson sem minnkaði muninn í uppbótartíma, mark sem litlu breytti.

Burnley situr því áfram sem fastast í fallsæti en Aston Villa er að berjast um fjórða sæti deildarinnar.