Vilja skattfrjálsa leiðréttingu húsnæðisskulda

Hjón sem fá 56 milljónir króna afskrifaðar af húsnæðisláni greiða eina komma tvær milljónir króna í skatt af leiðréttingunni, verði nýtt frumvarp að lögum.

Hagsmunasamtök heimilanna fagna frumvarpinu en hefðu viljað sjá skattfrjálsa leiðréttingu húsnæðisskulda.

Fjármálaráðherra mælti fyrir frumvarpinu á Alþingi í dag. Um er að ræða breytingar á lögum um tekjuskatt. Nýju ákvæðin eru til bráðabirgða og ná til tekjuáranna 2009 til 2011.

Þeir einstaklingar sem fá afskrifaðar 10 milljónir króna eða minna og þau hjón sem fá 20 milljónir eða minna í leiðréttingu af skuldum þurfa ekki að greiða skatt. Af öllu umfram þá upphæð er ýmist greiddur skattur af helmingi eða fjórðungi niðurfellingar.

Í frumvarpinu segir að miðað við þær upplýsingar sem liggi fyrir um skuldastöðu heimilanna komi í langflestum tilvikum ekki til neinnar skattskyldu vegna leiðréttingar og eftirgjafar á skuldum.

Tökum dæmi um hjón með gengistryggt lán sem stendur í 100 milljónum króna, vegna fasteignar sem metin er á 40 milljónir. Miðað við 110% leiðina sem bankarnir bjóða, gæti leiðréttingin á láninu numið 56 milljónum króna. Verði frumvarpið óbreytt að lögum þyrftu hjónin að greiða skatt af þremur milljónum króna. Heimilt er að fresta skattlagningu um tvö ár og að þeim tíma liðnum er hægt að dreifa skattgreiðslum á fimm ár. Tekjuskattur og útsvar yrði þannig 240 þúsund krónur á ári í fimm ár.

Hagsmunasamtök heimilanna fagna frumvarpinu en telja það ekki ganga nógu langt.