Tíundi hver borgaði fasteignagjöld of seint

Ellefu prósent af álögðum fasteignagjöldum Reykjavíkurborgar á síðasta ári voru send til milliinnheimtufyrirtækis í innheimtu. Alls voru vanskilin 1.982 milljónir króna og greiðendurnir 5.472 talsins. Meðalskuld hvers gjaldanda var um 362.000 krónur sem er meira en þreföld fasteignagjöld meðal-íbúðar.

Í svari borgarinnar við fyrirspurn Fréttablaðsins kemur ekki fram hve stór hluti vanskilanna er vegna íbúðarhúsnæðis og hve stór vegna atvinnuhúsnæðis. „Stór hluti vanskila fasteignagjalda er vegna fasteignafélaga sem lent hafa í erfiðleikum í kjölfar þrenginga í efnahagsmálum," segir hins vegar þar.

Af 5.472 greiðendum stóðu 3.282 skil á gjöldum sínum fyrir tilstuðlan milliinnheimtufyrirtækis og greiddu samtals 725 milljónir króna eða um 36 prósent af heildarvanskilum. Um áramót voru 2.190 aðilar enn í vanskilum með 1.257 milljóna króna fasteignagjöld, sem svarar til um 7% af álögðum heildargjöldum. Meðal-vanskil um áramót voru um 574 þúsund krónur.

Í svarinu kemur fram að fasteignagjöld hafi verið send í milliinnheimtu hafi þau ekki verið greidd tuttugu dögum eftir eindaga. Fréttablaðið spurði um þá skilmála sem borgin setur millifyrirtækjum um innheimtukostnað. Því er til svarað að innheimtukostnaðurinn vegna ársins 2009 hafi verið samkvæmt samningi borgarinnar og milliinnheimtufyrirtækis mun lægri en hámarksfjárhæðir samkvæmt lögum. Milliinnheimta og löginnheimta vegna ársins 2010 séu nú í útboðsferli.

Greiðslu fasteignagjalda var dreift á níu gjalddaga árið 2009 og leiddi það til þess að kröfum og útsendum greiðsluseðlum fjölgaði verulega frá því sem var þegar gjalddagarnir voru sex talsins.

Alls voru 41.654 kröfur sendar í milliinnheimtu, eða tæplega sex kröfur á hvern aðila.

Fréttablaðið hefur ekki undir höndum samning borgarinnar við fyrirtækið Momentum um innheimtuna. Miðað við að lágmarksþóknun hafi verið 600 krónur fyrir innheimtubréf hefur heildarþóknun vegna fyrstu innheimtutilrauna verið 25 milljónir króna.

Dagur B. Eggertsson, oddviti Samfylkingarinnar, hefur óskað eftir umræðu um vanskilainnheimtu á borgarráðsfundi í dag.

peturg@frettabladid.is