Hrun hjá Reading í síðari hálfleik

Þrenna frá Norðmanninum John Carew endaði Öskubuskuævintýri Íslendingaliðsins Reading í ensku bikarkeppninni. Aston Villa vann leikinn, 2-4, og er komið í undanúrslit bikarkeppninnar.

Reading stóð ótrúlega vel að vígi í leikhléi er liðið leiddi 2-0 með mörkum frá Shane Long.

Leikmenn Reading mættu aftur á móti meðvitundarlausir til leiks í síðari hálfleik.

Eftir rúmlega mínútu leik í síðari hálfleik var Ashley Young búinn að minnka muninn fyrir Villa. Þá fór allt í baklás hjá Reading og John Carew skoraði tvö mörk, á 51. og 57. mínútu. Villa komið yfir í leiknum eftir aðeins rúmlega ellefu mínútur í síðari hálfleik.

Reading sótti nokkuð grimmt að marki Villa eftir það og var óheppið að ná ekki inn marki.

Það var síðan komið fram í uppbótartíma þegar Ívar Ingimarsson braut klaufalega á Carew. Norðmaðurinn tók vítið sjálfur, skoraði og tryggði Villa magnaðan sigur, 2-4.