Ingvar Kale: Held öllum möguleikum opnum

Ingvar Þór Kale, markvörður Íslandsmeistara Breiðabliks, er einn fjölmargra markvarða sem eru að losna undan samningi á næstu dögum.

Hann hefur staðið sig mjög vel í marki Blika síðustu tvö ár og á stóran þátt í fyrsta Íslandsmeistaratitli karlaliðsins.

"Ég á eftir að skoða mín mál en held öllum möguleikum opnum. Ég er pollrólegur yfir þessu. Auðvitað eru líkur á því að ég verði áfram í Breiðablik en ég á eftir að ræða við þá og held eðlilega öllu opnu þar til ég hef samið," sagði Ingvar við Vísi.

Hann er einn þeirra markvarða sem orðaður er við KR.

"Strákarnir í vinnunni hafa eitthvað verið að stríða mér í dag að ég sé að fara í KR. Það er nú ekki rétt enda allt opið. Þetta kemur allt í ljós. Ég á eftir að ræða við menn og vega og meta hvað mér líst best á."