Fletcher: Ég nýt þess í botn að spila þessa leiki

„Við vitum að þeir eru með hörkugott lið sem spilar mjög breskan fótbolta. Þeir eru baráttuglaðir og gefa þér aldrei neinn tíma og við þurfum að vera tilbúnir að mæta þeim af fullum krafti.

Þeir búa einnig yfir miklum hraða og eru stórhættulegir í skyndisóknum og við þurfum að passa upp á það," sagði miðjumaðurinn Darren Fletcher hjá Manchester United á blaðamannafundi í gær fyrir leikinn gegn Aston Villa í úrslitum deildarbikarsins í dag.

Fletcher hefur verið þekktur fyrir að lyfta leik sínum á hærra plan í stóru leikjunum enda ástæða fyrir því að knattspyrnustjórinn Sir Alex Ferguson velur hann jafnan í byrjunarlið sitt fyrir mikilvægustu leikina.

„Í stóru leikjunum snýst þetta fyrst og fremst um að vera með kollinn í lagi. Þetta snýst raunar frekar um andlegan en líkamlegan styrk og ég nýt þess í botn að spila þessa leiki," sagði Fletcher.