Arteta spenntur fyrir að spila fyrir enska landsliðið

Spánverjinn Mikel Arteta myndi íhuga það að spila fyrir enska landsliðið í knattspyrnu ef kallið kæmi. Hann má spila fyrir landsliðið þar sem hann er kominn með ríkisborgararétt í landinu.

Miðjumaðurinn þarf að kljást við bestu knattspyrnumenn heims í lansliði sínu, menn eins og Xavi og Andrés Iniesta ásamt Cesc Fabregas. Hann hefur oft verið orðaður við enska landsliðið en hann hefur aldrei spilað fyrir A-landslið Spánar.

"Auðvitað myndi ég íhuga þetta ef Fabio Capello talar við mig," sagði Arteta sem er fyrirliði Everton.

"En ef ég á að vera hreinskilinn þá veit ég ekki hvort að hann hringi og hvort að þetta sé möguleiki," sagði Arteta sem er orðinn 28 ára gamall og verður líklega aldrei valinn í spænska landsliðið.