Capello: Var guð en er nú skrímsli

Fabio Capello, landsliðsþjálfari Englands, gerir sér fulla grein fyrir því að hann eigi verk að vinna til að endurheimta traust stuðningsmanna enska landsliðsins.

Hann sagði í gær að litið hefði verið á hann sem guð eftir gott gengi enska landsliðsins í undankeppni HM 2010 en að hann hafi verið gerður að skrímsli eftir slæmt gengi í Suður-Afríku í sumar.

„Þið skapið guðinn og þið skapið skrímslið. Þið hafið skapað skrímsli," sagði hann á blaðamannafundi enska landsliðsins í gær. England mætir Búlgaríu í undankeppni EM 2012 í kvöld.

„Við töpuðum einum leik á HM, fyrir Þýskalandi, eftir ein stór mistök hjá dómaranum. Það er enginn sem man eftir því," sagði hann. „Það var mikið sagt og skrifað eftir það og álitið á mér breyttist. En ég get lifað með þessu og þetta er ekkert vandamál hvað mig varðar."