Nani: Gerrard ætti að fara frá Liverpool

Portúgalski vængmaðurinn Nani ákvað að tjá sig um málefni Steven Gerrard við fjölmiðla. Manchester United og Liverpool mætast í stórleik helgarinnar á morgun.

„Ég veit ekki hvað Gerrard hyggst gera í sumar en það er eðlilegt að leikmaður með þessa hæfileika vilji vinna titla. Ef það er ekki að gerast hjá Liverpool ætti hann að skoða aðra kosti," sagði Nani.

Sá portúgalski er kokhraustur fyrir leikinn á morgun. „Ég þori að veðja upp á að við töpum ekki heimaleik það sem eftir er tímabils. Það kæmi mér ekki á óvart ef við næðum að vinna þrennuna, við erum besta félag heims og með frábært lið," sagði Nani.

„Fyrir tímabilið bjóst ég við því að Liverpool yrði meðal þeirra liða sem myndu berjast um Englandsmeistaratitilinn. Staða þeirra kemur mér á óvart. Kannski hafa meiðsli lykilmanna sett strik í reikninginn."

Nani segist hafa fengið að kynnast því á Englandi hve miklu máli leikir Manchester United og Liverpool skipta. „Þetta snýst ekki bara um þrjú stig, stolt stuðningsmanna er einnig að veði. Þetta er rosalegur rígur," sagði Nani.