Sveinn Andri spyr um ferðir Agnesar á „heilsuhæli“ í boði auðmanna

Sveinn Andri Sveinsson, lögmaður, spyr hvort Agnes Bragadóttir, blaðamaður á Morgunblaðinu, sé til þess bær að fjalla um bankahrunið og útrásina með trúverðugum hætti. Hann vill vita hversu oft hún þáði boð um dvöl á „heilsuhælum" erlendis frá íslenskum viðskiptajöfrum.

„Allir þátttakendurnir í hruninu sem og þeir aðilar sem gera upp hrunið með einum eða öðrum hætti eru og verða undir stöðugri smásjá; bæði annarra stofnana og eftirlitsaðila sem og fjölmiðla. En hvað með fjölmiðlana sjálfa? Hvað með blaðamennina sem þjónkuðust við útrásarvíkingana eða þáðu frá þeim dúsur?" segir Sveinn Andri í pistli á Pressunni í dag.

Hann segir að dagblöðin séu enn í eigu stórfyrirtækja sem geri þau út til að gæta hagsmuna sinna og ekkert uppgjör virðist hafi farið fram á störfum blaðamanna á tímum útrásarinnar. Hann tekur sem dæmi skrif Agnesar í Sunnudagsmogganum um Sjóvá og Milestone.

Því næst spyr Sveinn Andri hvort Agnes sé til þess bær að fjalla um bankahrunið og útrásina með trúverðugum hætti. „Hefur hún gert upp tengsl sín við hina svokölluðu útrásarvíkinga og þær gjafir og fjárstyrki sem hún hlaut frá þeim þegar allt lék í lyndi?"

Sveinn Andri segir að Agnes þurfi að upplýsa lesendur Morgunblaðsins um eftirfarandi: „Hversu margar boðsferðir til útlanda þáði Agnes frá íslenskum viðskiptajöfrum? Hversu mörg boð um dvöl á „heilsuhælum" erlendis þáði Agnes frá íslenskum viðskiptajöfrum? Hverjir voru það sem greiddu kostnaðinn í hvert og eitt skipti? Hver var kostnaður við hverja og eina ferð og dvalarkostnaður?"

Jafnframt segir Sveinn Andri að áður en Agnes heldur áfram að dæma gerendur í bankahruninu verði hún að gera lesendum Morgunblaðsins grein fyrir þessu og draga ekkert undan. „Ella geta þeir ekki treyst því að hún fjalli um hrunið með hlutlausum og málefnalegum hætti." Pistilinn er hægt að lesa hér.