Aðildarumsóknin best heppnaða brella seinni ára

„Hugmyndin að sækja um og sjá hvað er í boði er vafalaust best heppnaða pólitíska brella seinni ára. Ekki getur fólk verið á móti því að kostir aðildar séu kannaðir," sagði Haraldur Benediktsson, formaður Bændasamtaka Íslands, við upphaf Búnaðarþings í dag.

Haraldur sagði að aðildarumsóknin væri ekki annað en boð um að hér verði hafist handa við að breyta stjórnkerfi landsins að kröfum Evrópusambandsins og færa sjálfsstjórn Íslands og sjálfstæði undir fjarlæg stjórnvöld. Hann sagði að undirbúningur bænda vegna aðildarviðræðna stjórnvalda við ESB væri traustur og byggi á áralangri þekkingaröflun um innviði landbúnaðarstefnu sambandsins.

Þá sagði Haraldur að ríkisstjórnin væri vægast sagt ósamstíga í Evrópusambandsmálunum. „Það er varla hægt að búast við glæstum árangri þegar þeir sem standa í stafni bera ekki gæfu til að standa saman og sýna styrk," sagði formaðurinn og bætti við að veikleikar Íslendinga væru styrkleikar viðræðuaðilans.

„Sáttmáli stjórnarflokkanna um aðildarumsókn líkist því helst að ákveðið hafi verið að tvímenna í útreiðartúr til ESB-girðingarinnar. Annar snýr aftur og hinn fram í hnakknum og síðan hotta þeir á klárinn í sitt hvora áttina. Meðan aðildarsinninn horfir yfir taglið sér hann fyrirheitnu girðinguna fjarlægjast en streðar þó enn. Hinn þorir ekki að taka almennilega í tauminn og stöðva. Ekki get ég hugsað þá hugsun til enda, eins og sagt er nú á tímum, hvernig útreiðartúrinn endar," sagði Haraldur.