„Öfugmæli að kenna sáttmálann við stöðugleika“

Aðalsteinn Baldursson, formaður verkalýðsfélags Húsavíkur, vill slíta stöðugleikasáttmálanum sem aðilar vinnumarkaðsins og stjórnvöld undirrituðu í fyrrasumar. Það eina samningurinn hafi gert er að þyngja gríðarlega byrðar almennings í landinu. Því sé ekki að kenna sáttmálann við stöðugleika.

„Hér býr tæplega 50% þjóðarinnar við kjaraskerðingu frá hruninu, skuldir heimilanna hafa margfaldast og atvinnuleysi er gríðarlegt og fer vaxandi. Í stöðugleikasáttmálanum er auk þess talað um að flýta fyrir stórframkvæmdum og atvinnuuppbyggingu sem efndir hafa ekki orðið á,“ segir Aðalsteinn í samtali við fréttastofu.

Hann vill að Alþýðusambandið og Samtök atvinnulífsins slíti samningnum. „Ég veit ekki um eitt einasta atriði sem þar sem samningurinn hefur hjálpað til við uppbyggingu heimilanna.“

Aðalsteinn segir að heiti stöðugleikasáttmálans sé afar merkilegt. „Það er algjört öfugmæli að kenna sáttmálann við stöðugleika. Ég veit ekki um neinn sem hefur orðið var við einhvern stöðugleika í landinu. Ég auglýsi hér með eftir viðkomandi.“