Eva Joly miklu vinsælli en Sarkozy

Þegar Eva Joly tilkynnti um forsetaframboð sitt í Frakklandi fyrir hálfu ári talaði einn fréttaskýrandinn um hana sem fljúgandi furðuhlut.

Hún var að vísu þekkt í landinu fyrir rannsókn sína á spillingarmálum, en það þótti dálítið langsótt að hún skyldi bjóða sig fram til forseta.

Furðuhluturinn fljúgandi hefur hinsvegar núna stimplað sig rækilega inn í franska pólitík. Ipsos stofnunin gerði níunda september könnun á vinsældum stjórnmálamanna í Frakklandi.

Þar lenti Joly í 25. sæti heilum tíu sætum fyrir ofan Nicolas Sarkozy forseta. Jacques Chirac fyrrverandi forseti er ennþá vinsælasti stjórnmálamaður landsins, en það er svosem ekkert sem Eva Joly þarf að hafa áhyggjur af. Chirac verður ekki í framboði í kosningunum eftir tvö ár.

Eftir vinsældakönnunina setti franska blaðið Libération fram hugtakið „Evu-áhrifin." Þau virðast verða sterkari og sterkari.

Frakkar virðast kunna vel við þessa konu og ótrúlegt ferðalag hennar frá því að vera skraddaradóttir í Grünerlökke í Noregi til þess að rétta út hendina eftir lyklunum að forsetahöll Frakklands.