Adebayor: Ég vildi ekki fara frá Arsenal

Emmanuel Adebayor segist vita að hann fái óblíðar móttökur þegar hann spilar næst á Emirates vellinum, heimavelli Arsenal. Hann segir þó að það hafi ekki verið sín ákvörðun að yfirgefa Arsenal á sínum tíma.

„Arsene Wenger getur ekki haldið því fram að ég hafi viljað fara frá Arsenal. Ég fór því Arsene vildi ekki halda mér lengur," sagði Adebayor í viðtali við franska sjónvarpsstöð.

„Það sem fór mest í taugarnar á mér var þegar ég las fréttir um að ég hafi farið til að elta peninga," sagði Adebayor sem er launahæsti leikmaður ensku úrvalsdeildarinnar.

„Sumir fjölmiðlar sögðu að ég hafi haft neikvæð áhrif í búningsherberginu. Ef einhver leikmaður segir að ég hafi talað illa um einhver í búningsherberginu þá vill ég vita hver það er. Það hefur aldrei gerst í mínu lífi."

„Þetta verður 90 mínútur af helvíti," segir Adebayor um væntanlegan leik City gegn Arsenal 24. apríl á Emirates. „Stuðningsmenn munu baula á mig og kalla ýmis orð. Þar til nú hafa þeir ekki haft skilning á því hvers vegna ég fór. Ég er vondi kallinn."

Ekki var mikil ánægja með það þegar Adebayor skoraði gegn Arsenal í september og hljóp langa vegalengd að stuðningsmönnum liðsins til að fagna. „Ég hefði ekki átt að gera það. En við erum manneskjur. Ég geri mistök, hver gerir ekki mistök?"