Smokkar settir í hæsta skattþrepið

„Ríkið setur smokka í hæsta skattþrep sem gerir það að verkum að það er 25,5 prósenta virðisaukaskattur á þeim,“ segir Halldór Guðmundsson, annar eigandi Líkama og lífsstíls, umboðsaðila One smokka á Íslandi. Halldór er þeirrar skoðunar að smokkar ættu að vera án virðisaukaskatts eða í mesta lagi skattlagðir eins og matvæli og aðrar nauðsynjavörur.

Álfheiður Ingadóttir heilbrigðisráðherra segir beiðni frá Sóttvarnaráði hafa legið á borði heilbrigðisráðuneytisins frá því árið 2004, varðandi aðgang ungs fólks að ókeypis smokkum.

„Klamidía er í sókn hér á landi og það kemur í ljós í könnun frá því í sumar að það eru ekki nema tuttugu prósent ungmenna sem nota smokk,“ segir Álfheiður. „Allt frá árinu 2004 hefur Sóttvarnaráð lagt þetta til við ráðherra án þess að það hafi leitt til niðurstöðu. Við höfum kallað eftir upplýsingum frá fjármálaráðuneytinu og Landlækni varðandi þetta mál.“

Samkvæmt upplýsingum frá fjármálaráðuneytinu voru tekjur ríkisins árið 2009 af innflutningi á smokkum um 25,6 milljónir, fyrir álagningu heild- og smásala.

Haraldur Briem sóttvarnalæknir, segir vel fylgst með smitleiðum kynsjúkdóma af Landlæknisembættinu. „Það myndi draga gríðarlega úr tíðni ýmissa kynsjúkdóma ef Íslendingar væru duglegri að nota smokkinn,“ segir Haraldur. „Það er verið að skoða þessi mál í fullri alvöru. Hvort mögulegt sé að auka aðgengi að smokkum og lækka verðið á þeim. Einnig verður að sannfæra ungt fólk í eitt skipti fyrir öll um mikilvægi þess að nota þá.“ Haraldur segir gríðarlegan kostnað fylgja því að greiða niður smokka, en það hafi verið rætt innan embættisins.

Stefán R. Birgisson, deildarstjóri hjá Halldóri Jónssyni ehf., umboðsaðila Durex á Íslandi, er ekki sammála því að verð á smokkum sé fyrirstaða hjá ungu fólki. „Notkunin hefur haldist stöðug á síðustu árum,“ segir Stefán. „Smokkar eru ekki feimnismál lengur og að meðaltali kostar stykkið um 150 krónur.“

Samkvæmt könnun Fréttablaðsins eru smokkar ódýrastir í netversluninni Smokkur.is, 1.199 krónur stór pakki.

sunna@frettabladid.is