Faðir sjö ára stúlku sýknaður af ásökunum um barnaníð

Faðir sjö ára stúlku var sýknaður í Héraðsdómi Suðurlands af ásökunum að hafa beitt hana grófu kynferðislegu ofbeldi. Meðal annars með því að láta stúlkubarnið hafa við sig munnmök, nauðgað henni og í eitt skiptið sýnt telpunni klámmynd.

Í niðurstöðu héraðsdóms kemur fram að framburður stúlkunnar hafi verið óljós og breyst við framgang málsins.

Það var skólastjóri stúlkunnar sem hafði samband við starfsmann barnaverndarnefndar og lét vita af málinu og sagðist hafa áhyggju af aðstæðum stúlkunnar. Þá kom fram að starfsmanni barnaverndarnefndar hafi borist til eyrna frá aðila sem þekkti til að maðurinn hefði fátt gert annað í síðustu heimsókn sinni á heimilið en að horfa á klámfengið myndefni og fróa sér.

Hafi starfsmaðurinn því boðað móður stúlkunnar í viðtal og hún þá staðfest þetta. Hafi hún fundið klámfengna mynd innan um barnaefni stúlkunnar.

Nokkur vitni voru leidd fyrir dóminn sem komið höfðu að kennslu eða umönnun stúlkunnar á árunum 2008 og 2009 til að upplýsa hvort vart hefði orðið breytinga á hegðun stúlkunnar á þessum tíma. Kom fram hjá nokkrum þeirra að þau hefðu veitt því eftirtekt að stúlkan ætti það til, umfram aðra krakka, að leika sér á kynferðislegan hátt með dúkkur.

Maðurinn neitaði sök alfarið og þótti sekt hans ekki nægilega sönnuð gegn óljósum framburði stúlkunnar.