Hannes: Skoða KR eins og annað

Hannes Þór Halldórsson, markvörður Fram, er að losna undan samningi við félagið og íhugar nú framtíðina.

"Það er ekki að ástæðulausu að ég er samningslaus núna. Ég vildi klára þetta tímabil og sjá svo til með framhaldið," sagði Hannes við Vísi en hann hefur leikið með Fram í fjögur ár.

Þessi 26 ára gamli markvörður er einn tveggja íslenskra markvarða sem er hvað sterkastur orðaður við KR. Hinn er Ingvar Þór Kale, markvörður Breiðabliks.

"Ég veit ekkert um KR og hef ekki rætt við neinn þaðan. Ég hef samt heyrt þennan orðróm. Ef þeir hafa samband þá skoða ég KR eins og annað."