Rocha gaf Hermanni verðlaun sín

„Maður er í þessu fyrir þessi augnablik. Að sjá leikmenn svona glaða í búningsklefanum og áhorfendur svona glaða í stúkunni," sagði knattspyrnustjórinn Avram Grant eftir sigurinn magnaða hjá Portsmouth gegn Tottenham í gær.

Liðið er nú komið í úrslit bikarkeppninnar eftir ótrúlegt tímabil. Það er fallið úr úrvalsdeildinni og er í greiðslustöðvuna en leikmenn gátu leyft sér að brosa í gær.

„Mínir menn lögðu sig alla fram í þessum leik og eiga þetta skilið. Ricardo Rocha fékk verðlaun fyrir að vera maður leiksins og gaf Hermanni Hreiðarssyni þau í klefanum eftir leik," sagði Grant en Hermann er meiddur eins og kunnugt er og leikur ekki meira á tímabilinu.