Vilja ekki bæði Ögmund og Jón í ríkisstjórn

Mikil óánægja er innan Samfylkingarinnar með að Ögmundur Jónasson sé á leið inn í ríkisstjórn á sama tíma og Jón Bjarnason situr þar áfram, en þeir eru báðir sagðir tilheyra órólegu deildinni í Vinstri grænum. Af þessum sökum hefur forsætisráðherra ákveðið að kalla saman flokksstjórnarfund í Samfylkingunni í fyrramálið.

Það hefur legið í loftinu um nokkurra vikna skeið að stokkað yrði upp í ríkisstjórninni og í gærkvöldi hófst ráðherrakapallinn fyrir alvöru þegar forsætisráðherra kallaði þingmenn Samfylkingarinnar einn á fætur öðrum á sinn fund í stjórnarráðinu. Í morgun komu þingflokkar stjórnarflokkanna svo saman til vinnufundar og var búist við að formenn flokkanna greindu þar frá niðurstöðum sínum varðandi nýja skipan við stjórnarborðið og þingmenn augljóslega spenntir að heyra niðurstöðuna.

Fjármálaráðherra átti síðan tveggja stunda fund með forsætisráðherra í hádeginu.

Forsætisráðherra sagði eftir fundinn að hún vonaði að hægt yrði að ganga frá málinu í dag en það varð ekki niðurstaðan. Samkvæmt heimildum fréttastofunnar er það aðallega vegna óánægju innan Samfylkingarinnar með að Jón Bjarnason sitji áfram á ráðherrastóli á sama tíma og Ögmundur Jónasson settist á ný við stjórnarborðið.

Ögmundur: Jóhanna skipar til sætis

Forsætisráðherra hefur umboð flokksstjórnar til að gera breytingar á ríkisstjórninni. En síðdegis var ákveðið að kalla flokksstjórnina saman klukkan tíu í fyrramálið, að loknum þingflokksfundi þar sem niðurstaðan verður kynnt. Vinstri grænir funduðu einnig fram eftir degi.

„Þetta verður allt saman tilkynnt þegar þetta verður tilbúið. Fram af því ræðum við þetta ekki við fjölmiðla," sagði Steingrímur J. Sigfússon, fjármálaráðherra.

„Það er á hendi forsætisráðherra að skipa til sætis í Stjórnarráðinu. Hún hefur ekki kallað mig til fundar," sagði Ögmundur Jónasson, þingmaður VG og fyrrverandi ráðherra. Hann vill taka sæti í ríkisstjórn á nýjan leik. „Ég er búinn að vera það í 11 mánuði. Ég fór út úr ríkisstjórninni vegna ágreinings um Icesavedeiluna. Sú deila er komin inn í allt annan farveg en hún var þá."

Ef þingflokkar og flokksstjórn blessa nýjan ráðherralista í fyrramálið er reiknað með að ríkisráðsfundur verði á Bessastöðum skömmu fyrir hádegi þar sem nýir ráðherra taka við og einhverjir yfirgefa stjórnarborðið.

Ögmundur og Jón kallaðir á fund Jóhönnu

Nú síðdegis kallaði forsætisráðherra Ögmund Jónasson og Jón Bjarnason á sinn fund í Stjórnarráðinu, væntanlega til að ræða stöðu þeirra.