Kringlan flokkaði hundrað tonn af sorpi

Verslunareigendur og starfsfólk Kringlunnar flokkaði um hundrað tonn af sorpi árið 2009. Þetta lætur nærri að vera 23% af öllu sorpi sem féll til í tengslum við rekstur verslunarmiðstöðvarinnar samkvæmt tilkynningu frá Kringlunni.

Í byrjun árs hóf Kringlan að flokka sorp og var við það tilefni tilkynnt um það markmið Kringlunnar að í ársbyrjun árið 2012 verði 40% af öllu sorpi flokkað.

Allur bylgjupappi, plast, dagblöð/tímarit og drykkjarumbúðir er flokkað.

Markmiðið með flokkuninni er einkum tvíþætt. Með hverju flokkuðu kílói af sorpi sparast 21 króna, þar sem greiða þarf 15 krónur fyrir urðun á hverju kílói af óflokkuðu sorpi. Þá fást greiddar 6 krónur fyrir hvert kíló af flokkuðum pappa og plasti.

Rekstrarkostnaður Kringlunnar á þessu sviði hefur því lækkað um rúmar tvær milljónir króna árið 2009.

Árlega falla til 500 til 700 tonn af sorpi í húsinu.