Björgólfur fer ekki frítt frá KR

Kristinn Kjærnested, formaður knattspyrnudeildar KR, segir að Björgólfur Takefusa sé samningsbundinn leikmaður og verði ekki leystur undan samningi án greiðslu.

Í dag sagði Björgólfur í samtali við Fótbolti.net að það væri sameiginlegur vilji hjá bæði KR og honum sjálfum að slíta samstarfinu.

„Það er ekki rétt. Við höfum alla tíð sagt að við viljum halda honum enda gerðum við hann tveggja ára samning í fyrra," sagði Kristinn í samtali við Vísi í dag.

„Hann hefur óskað eftir því að fá að fara en það þarf að gera tilboð í hann. Það stendur ekki til að leysa hann undan samningi eða neitt því líku. Hann fer ekki frítt frá okkur."