Friðarviðræður strand meðan byggt er

Umleitanir bandarískra stjórnvalda til að koma friðarviðræðum milli Ísraels og Palestínu af stað á ný hafa enn sem komið er ekki skilað árangri. Þetta hefur fréttastofa AP eftir Ahmed Aboul Gheit, utanríkisráðherra Egyptalands, í gær.

Innan við hálfur mánuður er til stefnu þar til Palestínustjórn tekur ákvörðun um hvort slíta beri friðarviðræðunum. Þær hófust í Washington í Bandaríkjunum í síðasta mánuði, en hafa legið niðri vegna þess að Ísraelar neita að stöðva byggingu landtökubyggða á Vesturbakkanum. Benjamín Netanjahú, forsætisráðherra Ísraels, neitaði að framlengja bann á byggingu landtökubyggða sem gilt hafði í tíu mánuði, en endaði 26. september.

Mahmoud Abbas, forseti Palestínustjórnar, segir ekki hægt að hefja viðræður að nýju nema tekið verði fyrir byggingaframkvæmdirnar. Síðan bannið rann úr gildi hefur verið hafin bygging 600 nýrra íbúða landtökumanna á Vesturbakkanum.

Utanríkisráðherra Egypta sagði fjölmiðlum eftir fund með Abbas í gær, að ríkisstjórn hans héldi áfram viðræðum við Bandaríkin og Ísrael, en fram til þessa hafi ekki komið til nauðsynlegra kaflaskila í viðræðunum. - óká